Rydym ni’n defnyddio JavaScript i osod y rhan fwyaf o’n cwcis. Yn anffodus, nid yw JavaScript yn rhedeg ar eich porwr, felly ni allwch newid eich gosodiadau trwy ddefnyddio’r dudalen hon. I reoli eich gosodiadau cwcis trwy ddefnyddio’r dudalen hon, rhowch gynnig ar droi JavaScript ymlaen yn eich porwr.

Gwybodaeth am gwcis

Rydym wedi arbed rhai ffeiliau o’r enw cwcis i’ch dyfais. Mae’r cwcis hyn:

  • yn hanfodol i waith y safle
  • yn helpu gwella’n gwefan trwy gasglu gwybodaeth ac adrodd am sut rydych chi’n ei defnyddio

Hefyd, hoffem arbed rhai cwcis i helpu:

  • gwella ein gwefan trwy fesur y defnydd o’n gwefan
  • cofio eich gosodiadau
Newid gosodiadau cwcis

Rydych chi wedi derbyn yr holl gwcis ar gyfer y wefan hon. Gallwch newid eich dewisiadau ar gyfer cwcis unrhyw bryd.

Wedi ei gyhoeddi

'Darn o waith trawiadol... darn o waith o safon uchel iawn'

Dyna sut y crynhodd y Gwir Anrhydeddus Arglwydd Ustus Green, Cadeirydd Comisiwn y Gyfraith, y Bil Amgylchedd Hanesyddol (Cymru) i'r Pwyllgor Deddfwriaeth, Cyfiawnder a'r Cyfansoddiad ar 26 Medi. Roedd yno yng nghwmni dau gyd-weithiwr arall o Gomisiwn y Gyfraith — Nicholas Paines KC a Dr Charles Mynors — i roi tystiolaeth i'r Pwyllgor er mwyn llywio ei ystyriaeth gychwynnol o'r Bil. Roedd y sesiwn eang yn ymdrin â materion cyffredinol yn ymwneud â chyfuno a chodio a chwestiynau manwl am argymhellion Comisiwn y Gyfraith a phenderfyniadau a wnaed i eithrio rhywfaint o ddeddfwriaeth o'r Bil. Yn eu tystiolaeth, nododd aelodau Comisiwn y Gyfraith ar ddrafftio rhagorol y Bil, ei ymlyniad agos at argymhellion Comisiwn y Gyfraith a dogfennaeth ategol 'cymeradwy' y Bil. Gallwch wylio'r sesiwn yn llawn ar Senedd TV neu darllenwch y trawsgrifiad.

Mae Comisiwn y Gyfraith yn gorff annibynnol statudol sy'n parhau i adolygu cyfraith Cymru a Lloegr gan argymell diwygio lle mae ei angen. Heb os, roedd y Pwyllgor yn awyddus i gael barn Comisiwn y Gyfraith ar y Bil nid yn unig oherwydd ei gyfrifoldebau cyffredinol, ond hefyd oherwydd ei ymwneud penodol â dechreuadau’r Bil.

Dylanwadodd adroddiad y Comisiwn yn 2016, sef Ffurf a Hygyrchedd y Gyfraith sy’n Berthnasol yng Nghymru, ar Ddeddf Deddfwriaeth (Cymru) 2019 a rhaglen gyfredol Llywodraeth Cymru i wella hygyrchedd cyfraith Cymru. Y Bil Amgylchedd Hanesyddol (Cymru) yw'r cynnyrch cyntaf ohono. Croesawodd aelodau Comisiwn y Gyfraith y Bil fel cam cychwynnol cadarn yn rhaglen Llywodraeth Cymru o atgyfnerthu a chodio.

Ym mis Tachwedd 2018, rhyddhaodd Comisiwn y Gyfraith ei adroddiad, sef Cyfraith Gynllunio yng Nghymru. Roedd yr adroddiad yn cynnwys rhai argymhellion penodol yn ymwneud â'r amgylchedd hanesyddol, ond roedd ganddo lawer o argymhellion ar gyfer cyfraith gynllunio oedd hefyd angen eu hystyried yn ystod yr ymarferiad atgyfnerthu amgylchedd hanesyddol. Mae cysylltiadau agos rhwng y cyfundrefnau deddfwriaethol ar gyfer yr amgylchedd hanesyddol a chynllunio ac maent yn aml yn rhedeg yn gyfochrog pan wneir gwaith ar adeiladau rhestredig neu mewn ardaloedd cadwraeth. Gyda phrosiect i atgyfnerthu'r gyfraith gynllunio ar y gweill ar hyn o bryd, rhagwelodd Dr Charles Mynors y bydd y canlyniad yn atgyfnerthiadau cyflenwol o 'ansawdd uchel iawn'.

Yn olaf, ar gais Llywodraeth Cymru, fe wnaeth Comisiwn y Gyfraith wneud argymhellion ar bedwar mater y tybiai eu bod yn addas ar gyfer atgyfnerthiad o dan Reolau Sefydlog newydd y Senedd ar Filiau atgyfnerthu.