Rydym ni’n defnyddio JavaScript i osod y rhan fwyaf o’n cwcis. Yn anffodus, nid yw JavaScript yn rhedeg ar eich porwr, felly ni allwch newid eich gosodiadau trwy ddefnyddio’r dudalen hon. I reoli eich gosodiadau cwcis trwy ddefnyddio’r dudalen hon, rhowch gynnig ar droi JavaScript ymlaen yn eich porwr.

Gwybodaeth am gwcis

Rydym wedi arbed rhai ffeiliau o’r enw cwcis i’ch dyfais. Mae’r cwcis hyn:

  • yn hanfodol i waith y safle
  • yn helpu gwella’n gwefan trwy gasglu gwybodaeth ac adrodd am sut rydych chi’n ei defnyddio

Hefyd, hoffem arbed rhai cwcis i helpu:

  • gwella ein gwefan trwy fesur y defnydd o’n gwefan
  • cofio eich gosodiadau
Newid gosodiadau cwcis

Rydych chi wedi derbyn yr holl gwcis ar gyfer y wefan hon. Gallwch newid eich dewisiadau ar gyfer cwcis unrhyw bryd.

Wedi ei gyhoeddi

Bydd mwy na 200 o safleoedd hanesyddol, tirnodau a gemau cudd Cymru yn cynnig mynediad am ddim i ymwelwyr fis Medi eleni — wrth i ŵyl Drysau Agored ddychwelyd ar gyfer 2022.

Wedi’i hariannu a’i threfnu gan Cadw, bydd gŵyl fythol boblogaidd treftadaeth adeiledig Cymru yn annog trigolion Cymru ac ymwelwyr fel ei gilydd i archwilio rhai o safleoedd llai adnabyddus y wlad ― y mae sawl un ohonyn nhw fel arfer ynghau i'r cyhoedd.

Mae rhaglen 2022 yn cynnwys amrywiaeth o leoliadau hanesyddol sy'n eiddo i Cadw, Ymddiriedolaeth Genedlaethol Cymru, Yr Eglwys yng Nghymru, cynghorau lleol, a pherchnogion preifat, gan gynnwys Abaty Nedd, Castell Ystumllwynarth, Amffitheatr a Barics Caerllion, Gerddi Bodnant, Castell Dinbych, ac Eglwys Gadeiriol Tyddewi.

Bydd 6 safle dan ofal Cadw sydd â staff, gan gynnwys dwy o gaerau canoloesol eiconig Cymru ― Castell Harlech yn y gogledd a Chastell Talacharn yn y de ― yn cynnig mynediad am ddim i aelodau o’r cyhoedd yn ystod y dathliad mis o hyd.

Yn y cyfamser, bydd 11 o safleoedd Cadw sydd heb staff, y mae nifer ohonyn nhw fel arfer ynghau i'r cyhoedd, hefyd yn cynnig teithiau tywys am ddim ar ddyddiadau dethol ym mis Medi ― gan gynnwys Siambr Gladdu Barclodiad y Gawres ar Ynys Môn.

Bydd safleoedd nad ydyn nhw dan ofal Cadw, fel Eglwys Gadeiriol Tyddewi, hefyd yn cynnig teithiau o ardaloedd sydd fel arfer ynghau i'r cyhoedd ― gydag ymwelwyr â chartref nawddsant Cymru yn cael eu croesawu i'r Hen Lapidariwm, sydd heb fod yn agored i'r cyhoedd ers sawl blwyddyn.

Dywedodd Ffion Reynolds, Rheolwr Treftadaeth a’r Celfyddydau, Cadw:

"Rydym yn croesawu dychweliad Drysau Agored ― cyfraniad blynyddol Cymru i Ddyddiau Treftadaeth Ewrop ― a fydd yn cael ei chynnal drwy gydol mis Medi.

"Nid yn unig y mae'n ddathliad o'r hanes cyfoethog a diddorol sydd gan Gymru i'w gynnig, ond yn gyfle i fwy o bobl nag erioed o'r blaen i ysbrydoli cariad gydol oes at hanes a diwylliant ― yn enwedig ymhlith cenedlaethau’r dyfodol.

"A thrwy agor y safleoedd hyn am ddim, rydym yn gobeithio cynnig cyfle cyfartal i bawb archwilio, mwynhau a datgelu straeon llai adnabyddus o hanes Cymru ar garreg eu drws."

Nid oes rhaid rhagarchebu ar gyfer safleoedd Cadw, p'un a ydyn nhw â staff neu heb staff. Anogir pobl i alw heibio eu hoff heneb, a gallan nhw hyd yn oed ymuno â'r teithiau tywys am ddim mewn rhai safleoedd.

Ar gyfer rhestr lawn o safleoedd treftadaeth Cadw, a’r rhai nad ydyn nhw dan ofal Cadw, sy'n cymryd rhan yng ngŵyl Drysau Agored ledled Cymru, cliciwch yma.

I gael gwybodaeth am sut i fynd i ddigwyddiad Drysau Agored nad yw'n cael ei gynnal ar safle Cadw, dylai ymwelwyr gysylltu â'r lleoliad perthnasol yn uniongyrchol neu ymweld â'u gwefan unigol i gael gwybodaeth bellach gan fod gofynion tocynnau'n amrywio fesul safle.

Bydd y cynnig Cadw-benodol ar gyfer Drysau Agored 2022 yn golygu y bydd casgliad o deithiau a digwyddiadau unigryw yn cael eu cynnal mewn 17 safle sydd dan ofal Cadw fis Medi ― gyda nifer gyfyngedig o docynnau ar gael ar gyfer pob digwyddiad.

Mae ymwelwyr yn cael eu cynghori i wirio dyddiad a manylion pob digwyddiad cyn a theithio.