Rydym ni’n defnyddio JavaScript i osod y rhan fwyaf o’n cwcis. Yn anffodus, nid yw JavaScript yn rhedeg ar eich porwr, felly ni allwch newid eich gosodiadau trwy ddefnyddio’r dudalen hon. I reoli eich gosodiadau cwcis trwy ddefnyddio’r dudalen hon, rhowch gynnig ar droi JavaScript ymlaen yn eich porwr.

Gwybodaeth am gwcis

Rydym wedi arbed rhai ffeiliau o’r enw cwcis i’ch dyfais. Mae’r cwcis hyn:

  • yn hanfodol i waith y safle
  • yn helpu gwella’n gwefan trwy gasglu gwybodaeth ac adrodd am sut rydych chi’n ei defnyddio

Hefyd, hoffem arbed rhai cwcis i helpu:

  • gwella ein gwefan trwy fesur y defnydd o’n gwefan
  • cofio eich gosodiadau
Newid gosodiadau cwcis

Rydych chi wedi derbyn yr holl gwcis ar gyfer y wefan hon. Gallwch newid eich dewisiadau ar gyfer cwcis unrhyw bryd.

Wedi ei gyhoeddi

Mae Deddf yr Amgylchedd Hanesyddol (Cymru) 2023 yn dod i rym ym mis Tachwedd

Ar 16 Awst, llofnododd Jane Hutt A, Ysgrifennydd y Cabinet dros Ddiwylliant a Chyfiawnder Cymdeithasol, y Trefnydd a’r Prif Chwip, Orchymyn Cychwyn yn pennu 4 Tachwedd 2024 fel y dyddiad y bydd Deddf yr Amgylchedd Hanesyddol (Cymru) 2023 (‘y Ddeddf’) yn dod i rym. Dyma’r cam cyntaf yng nghamau olaf rhaglen waith i ddod â’r Ddeddf a chyfres ategol o is-ddeddfwriaeth i rym ledled Cymru.

Mae mwy na blwyddyn wedi mynd heibio ers i’r Ddeddf dderbyn Cydsyniad Brenhinol, a daeth yn gyfraith ffurfiol ar 14 Mehefin 2023. Dim ond llond llaw o’i darpariaethau a ddaeth i rym bryd hynny, gan fod angen is-ddeddfwriaeth i gefnogi’r Ddeddf cyn bod modd ei rhoi ar waith yn gyffredinol. Roedd rhai rheoliadau a gorchmynion sefydledig eisoes wedi’u hymgorffori yn y Ddeddf. Byddai’n rhaid ailddatgan is-ddeddfwriaeth arall — er enghraifft, rheoliadau a allai fod angen eu diwygio’n aml — gan ddefnyddio’r un dull a fabwysiadwyd yn y cydgrynhoi: er mwyn gwella hygyrchedd y ddeddf trwy ei hailddatgan a’i haildrefnu, tra’n cadw ei heffaith.  

Yn ystod y misoedd ers y Cydsyniad Brenhinol, mae saith set o reoliadau wedi’u paratoi, yn ogystal â’r Gorchymyn Cychwyn.

  • Rheoliadau Ceisiadau am Gydsyniad Heneb Gofrestredig (Cymru) 2024
  • Rheoliadau Adeiladau Rhestredig ac Ardaloedd Cadwraeth (Gweithdrefn a Chyfradd Llog) (Cymru) 2024  
  • Rheoliadau Adeiladau Rhestredig (Adeiladau Crefyddol Esempt) (Cymru) 2024
  • Rheoliadau Adeiladau Rhestredig (Cytundebau Partneriaethau) (Cymru) 2024
  • Rheoliadau Henebion Cofrestredig (Cytundebau Partneriaethau) (Cymru) 2024
  • Rheoliadau Deddf yr Amgylchedd Hanesyddol (Cymru) 2023 (Darpariaeth Ganlyniadol) (Deddfwriaeth Sylfaenol) 2024
  • Rheoliadau Deddf yr Amgylchedd Hanesyddol (Cymru) 2023 (Darpariaeth Ganlyniadol) (Is-ddeddfwriaeth) 2024.

Bydd rhagor o wybodaeth am y rheoliadau hyn wrth iddynt gael eu cyflwyno ym mis Medi a mis Hydref. Byddant yn dod i rym ar yr un pryd â’r Ddeddf ar 4 Tachwedd.

Pan ddaw’r Ddeddf a’i rheoliadau ategol i rym ym mis Tachwedd, byddant yn disodli’r fframwaith deddfwriaethol presennol ar gyfer rheoli a gwarchod amgylchedd hanesyddol Cymru — yn bennaf Deddf Henebion ac Ardaloedd Archaeolegol 1979, Deddf Cynllunio (Adeiladau Rhestredig ac Ardaloedd Cadwraeth) 1990 a Rheoliadau Cynllunio (Adeiladau Rhestredig ac Ardaloedd Cadwraeth) (Cymru) 2012 — gyda deddfwriaeth gwbl ddwyieithog sydd wedi’i threfnu’n rhesymegol a’i mynegi’n glir.