Rydym ni’n defnyddio JavaScript i osod y rhan fwyaf o’n cwcis. Yn anffodus, nid yw JavaScript yn rhedeg ar eich porwr, felly ni allwch newid eich gosodiadau trwy ddefnyddio’r dudalen hon. I reoli eich gosodiadau cwcis trwy ddefnyddio’r dudalen hon, rhowch gynnig ar droi JavaScript ymlaen yn eich porwr.

Gwybodaeth am gwcis

Rydym wedi arbed rhai ffeiliau o’r enw cwcis i’ch dyfais. Mae’r cwcis hyn:

  • yn hanfodol i waith y safle
  • yn helpu gwella’n gwefan trwy gasglu gwybodaeth ac adrodd am sut rydych chi’n ei defnyddio

Hefyd, hoffem arbed rhai cwcis i helpu:

  • gwella ein gwefan trwy fesur y defnydd o’n gwefan
  • cofio eich gosodiadau
Newid gosodiadau cwcis

Rydych chi wedi derbyn yr holl gwcis ar gyfer y wefan hon. Gallwch newid eich dewisiadau ar gyfer cwcis unrhyw bryd.

Plas Mawr
Wedi ei gyhoeddi

Mae gwirfoddolwyr Plas Mawr wedi cyrraedd y rhestr fer ar gyfer gwobr o fri, sef Gwirfoddolwyr Amgueddfeydd a Threftadaeth y Flwyddyn.

Mae’r criw gwych o wirfoddolwyr yn Nhŷ Trefol Elisabethaidd Plas Mawr wedi gwneud mwy na’r disgwyl yn ystod y pandemig i sicrhau bod tŷ Plas Mawr yn parhau’n un o drysorau mwyaf croesawgar Cymru ym maes treftadaeth.

Mae wedi bod yn gyfnod anodd i bawb, a chafodd yr elfen addysgol sy’n perthyn fel rheol i’r profiad a gynigir ym Mhlas Mawr ei chyfyngu oherwydd y pandemig ac oherwydd nad oedd ysgolion yn gallu ymweld â’r lle. Fodd bynnag, daeth y tîm blaengar o wirfoddolwyr ymroddedig at ei gilydd gyda cheidwaid a thîm Dysgu Gydol Oes Cadw i helpu i greu ffilm a oedd yn dangos y teulu o oes y Tuduriaid yn paratoi ar gyfer parti, a buont yn serennu ynddi.

Roedd hynny’n golygu gwisgo’r dillad hardd a chywir o safbwynt hanesyddol y mae’r gwirfoddolwyr wedi bod yn eu creu yn eu sesiynau gwnïo, creu’r eitemau angenrheidiol ar gyfer ymolchi a glanhau dannedd, a mynd ati o ddifrif i ‘Baratoi ar gyfer Parti’. Roedd y gwaith yn cynnwys paratoi gwisg ar gyfer Robert Wynn a’i wraig Dorothy (sef ein gwirfoddolwyr ni, Clive a Jayne) a chymryd rhan yn y gwersi dawnsio hollbwysig.

Roedd y ffilm greadigol hon yn rhan o sesiynau rhithiol byw i ysgolion ledled Cymru, a gynhaliwyd gan y seren deledu enwog Llion Williams yn ystod pythefnos Gŵyl Hanes Cymru i Blant.

Oherwydd eu llwyddiant wrth greu’r profiad hwn, ac oherwydd eu hymrwymiad parhaus i Blas Mawr, cafodd y tîm ei enwebu ar gyfer y wobr o fri, sef Gwirfoddolwyr Amgueddfeydd a Threftadaeth y Flwyddyn.

Cafodd nifer enfawr o enwebiadau eu cyflwyno ar gyfer y Gwobrau Amgueddfeydd a Threftadaeth, ac roedd y gystadleuaeth yn agos. Ond o blith yr holl enwebiadau a gafwyd o bob cwr o’r DU, lluniodd y beirniaid restr fer o chwech a oedd yn cynnwys tîm gwirfoddolwyr Plas Mawr. 

Bydd yr enillwyr yn cael eu cyhoeddi mewn seremoni fawreddog, y bydd modd i bobl ei mynychu yn y cnawd, nos Fercher 11 Mai yn Llundain.

Rydym yn teimlo’n falch iawn drostynt. Mae cyrraedd y rhestr fer yn dipyn o gamp ac yn dyst i’w sgiliau rhagorol a’u hymrwymiad. Rydym yn gobeithio y byddant yn cael profiad gwych, haeddiannol yn y seremoni ac rydym yn dymuno’n dda iddynt.

@MandHShow #MandHAwards