Rydym ni’n defnyddio JavaScript i osod y rhan fwyaf o’n cwcis. Yn anffodus, nid yw JavaScript yn rhedeg ar eich porwr, felly ni allwch newid eich gosodiadau trwy ddefnyddio’r dudalen hon. I reoli eich gosodiadau cwcis trwy ddefnyddio’r dudalen hon, rhowch gynnig ar droi JavaScript ymlaen yn eich porwr.

Gwybodaeth am gwcis

Rydym wedi arbed rhai ffeiliau o’r enw cwcis i’ch dyfais. Mae’r cwcis hyn:

  • yn hanfodol i waith y safle
  • yn helpu gwella’n gwefan trwy gasglu gwybodaeth ac adrodd am sut rydych chi’n ei defnyddio

Hefyd, hoffem arbed rhai cwcis i helpu:

  • gwella ein gwefan trwy fesur y defnydd o’n gwefan
  • cofio eich gosodiadau
Newid gosodiadau cwcis

Rydych chi wedi derbyn yr holl gwcis ar gyfer y wefan hon. Gallwch newid eich dewisiadau ar gyfer cwcis unrhyw bryd.

Wedi ei gyhoeddi

Bydd yr elusen annibynnol – sy'n gofalu am Dŵr Llundain, Palas Hampton Court, Palas Kensington, Castell a Gerddi Hillsborough, a mwy – yn dathlu athrawon y DU sy'n gwneud hanes yn gyffrous, yn gynhwysol ac yn ystyrlon.

Yr hanesydd a’r darlledwr poblogaidd Lucy Worsley fydd yn arwain y panel beirniadu cenedlaethol, ochr yn ochr â Greg Jenner, Sathnam Sanghera, Dan Jones, Shalina Patel ac eraill.

Llundain, y DU - Dydd Mawrth 21ain Hydref 2025 – Mae Historic Royal Palaces yn cyhoeddi heddiw bod ei Wobrau Addysgu Hanes Ysbrydoledig cyntaf bellach ar agor ar gyfer ceisiadau. Wedi’i gyflwyno gyda chefnogaeth yr Historical Association (y Gymdeithas Hanesyddol) a phartneriaid ledled y DU, mae’r cynllun gwobrau cenedlaethol newydd hwn yn dathlu athrawon sy’n dod â’r gorffennol yn fyw mewn ystafelloedd dosbarth ledled y wlad. 

Yn fwy nag erioed, mae hanes yn bwnc hanfodol mewn ysgolion, gydag athrawon gwych ledled y DU yn ysbrydoli cariad tuag at a gwerthfawrogiad o'r gorffennol. Maen nhw’n helpu i wneud synnwyr o’r byd a lle rhywun ynddo. Maen nhw'n ysgogi chwilfrydedd drwy archwilio straeon pwysig sy'n berthnasol i bawb. Ac maen nhw'n annog pobl ifanc i ofyn cwestiynau a datblygu meddwl beirniadol – sgiliau hanfodol yn oes y cyfryngau cymdeithasol a deallusrwydd artiffisial. 

I gydnabod y gwaith pwysig hwn, bydd Historic Royal Palaces (HRP) yn dyfarnu 10 enillydd rhanbarthol a chenedlaethol – pob un yn derbyn gwobr ariannol o £500 iddyn nhw eu hunain ac £500 i’w hysgol ynghyd ag aelodaeth flynyddol o HRP a’r Historical Association (y Gymdeithas Hanesyddol), yn ogystal â’r cyfle i ddod yn Bencampwr Athrawon HRP. Bydd un enillydd cyffredinol yn derbyn £500 ychwanegol iddyn nhw eu hunain ac £500 i’w hysgol, ynghyd ag aelodaeth oes o HRP. Darllenwch y manylion llawn yn hrp.org.uk/teachingawards. 

Mae'r Gwobrau Addysgu Hanes Ysbrydoledig yn estyniad o waith Historic Royal Palaces ei hun i ddod â hanes yn fyw i bob plentyn yn y DU. Fel elusen annibynnol, nid yw HRP yn derbyn unrhyw gyllid gan y Llywodraeth na’r Goron ac mae’n dibynnu ar ymwelwyr, aelodau, rhoddwyr a phartneriaid i ofalu am ei chwe phalas rhyfeddol:Tŵr Llundain, Palas Hampton Court, Palas Kensington, y Tŷ Gwledda, Palas Kew, a Chastell Hillsborough a'r Gerddi.  

Dros y 10 mlynedd nesaf, mae wedi ymrwymo i gyrraedd pob ysgol yn y DU drwy ymweliadau ar-y-safle, rhaglenni ysgol, profiadau digidol newydd a chefnogaeth i athrawon. Mae'r Gwobrau Addysgu Hanes Ysbrydoledig yn nodi pennod newydd yn y nod hwnnw ac yn foment genedlaethol amserol i dynnu sylw at athrawon sy’n dod â’r gorffennol yn fyw, yn tanio chwilfrydedd, ac yn ysbrydoli disgyblion.  

Mae'r Gwobrau Addysgu Hanes Ysbrydoledig yn ymwneud â dylanwad y tu hwnt i ganlyniadau arholiadau. Bydd y panel beirniadu yn chwilio am arloesedd a dyfeisgarwch: y dosbarth sy’n cael ei gludo mewn ffordd lawn dychymyg i’r Hen Aifft neu Loegr y Tuduriaid; y plentyn sy’n dod adref yn awyddus i rannu ffeithiau syfrdanol; neu’r disgybl sy’n teimlo balchder newydd yn ei gymuned ar ôl darganfod arwr lleol a newidiodd y gymdeithas er gwell. 

Pwrpas y wobr genedlaethol newydd sbon hon yw dathlu athrawon o bob cwr o’r DU, ar bob cam yn eu gyrfa, o fewn Addysg Gynradd, Uwchradd, Addysg Bellach, Anghenion Addysgol Arbennig ac Anabledd neu Anghenion Cymorth Ychwanegol. Mae enwebiadau yn rhad ac am ddim, yn hawdd i’w gwneud, a gall unrhyw un dros 18 oed eu cyflwyno. Mae’r elusen yn annog cydweithwyr, rhieni, gwarcheidwaid, llywodraethwyr – ac athrawon eu hunain – i gefnogi addysgwyr hanes gwych sy’n gwneud gwahaniaeth. 

Ar ddydd Sadwrn 20 Mehefin 2026, cynhelir seremoni fawreddog yn Nhŵr Llundain lle bydd y 10 enillydd rhanbarthol a chenedlaethol yn cael eu dathlu, a bydd enw'r enillydd cyffredinol yn cael ei ddatgelu. 

Lucy Worsley, Hanesydd, Darlledwr a Llysgennad HRP, fydd yn arwain y broses farnu i benderfynu pwy sy’n cipio’r brif wobr. Meddai Lucy: "Mae addysgu hanes gwych yn dweud wrth ddisgyblion mwy na'r hyn ddigwyddodd yn unig —mae’n eu helpu i feddwl, cwestiynu a chysylltu â’r byd o’u hamgylch. Rydyn ni’n chwilio am yr unigolion ysbrydoledig sy’n gwneud hyn bob dydd yn eu hystafelloedd dosbarth. Os ydych chi'n un ohonynt – neu’n adnabod rhywun felly – anfonwch enwebiad. Bydd Gwobrau Addysgu Hanes Ysbrydoledig HRP yn gyfle pwysig i ddathlu eu gwaith caled, eu creadigrwydd a’u hangerdd.” 

  

Ar y panel beirniadu cenedlaethol gyda Lucy Worsley mae rhai o haneswyr, addysgwyr ac awduron mwyaf adnabyddus y DU, gan gynnwys:  

  • Greg Jenner - Hanesydd a Chyflwynydd Podlediad (You’re Dead To Me) 
  • Sathnam Sanghera - Newyddiadurwr ac Awdur (Empireland, Empireworld and TheBoy with the Topknot)
  • Dan Jones - Hanesydd, Awdur a Chyflwynydd Podlediad (This Is History)
  • Shalina Patel - Hanesydd, Athrawes ac Awdur (The History Lessons)
  • Michael Riley – Addysgwr Hanes ac Academydd 
  • Katie Hunter – Athrawes Hanes, Actifydd ac Ymchwilydd 

I sicrhau bod y gwobrau'n cyrraedd cymaint â phosibl o ranbarthau’r pedair cendl, mae HRP yn cydweithio â sefydliadau ar draws y pedair gwlad ddatganoledig. Mae partneriaid ledled y DU yn cynnwys yr Historical Association – sef y partner cyswllt ar gyfer y gwobrau – a’r Association of Independent Museums. Yng Nghymru, mae HRP yn bles iawn i weithio gyda Cadw; yn yr Alban, gyda'r Royal Collection Trust a Phalas Tŷ Holyroodhouse, y Scottish Maritime Museum, a’r Scottish Association for the Teaching of History; ac yng Ngogledd Iwerddon, gyda National Museums NI a’r History Teachers’ Association of Northern Ireland.

Mae Gwobrau Addysgu Ysbrydoledig HRP bellach ar agor ar gyfer ceisiadau yn hrp.org.uk/teachingawards. 

Bydd y cofrestriadau'n cau ar ddydd Sul 25 Ionawr 2026.