Adroddiad Heritage Counts 2019
Adroddiad Heritage Counts 2019 yn tynnu sylw at rôl swyddogion cadwraeth...
Mae swyddogion cadwraeth awdurdodau lleol yn cyflawni rôl bwysig mewn cymdeithas drwy helpu busnesau newydd a rhai sy’n ehangu i ddod o hyd i leoliadau priodol ac achub adeiladau sy’n hoff gan bawb rhag esgeulustod a rhag cael eu dymchwel o bosibl, meddai adroddiad newydd a gyhoeddwyd gan Grŵp Amgylchedd Hanesyddol Cymru (HEG).
Mae’r adroddiad Heritage Counts yn tynnu sylw at effeithiau a chyflawniadau’r sector treftadaeth yn 2018-19, yn cynnwys Neuadd y Farchnad yng Nghaergybi, sydd wedi’i ailwampio’n ddiweddar, ar ôl bod yn adfeiliedig am ddeng mlynedd, ac sydd bellach yn gartref i lyfrgell newydd, canolfan gymunedol a hyb menter ar gyfer busnesau newydd y dref. Mae’r gwaith o addasu adeiladau hanesyddol i greu bwyty’r Hen Fwthyn ym Mhen-y-bont ar Ogwr, a’r gwaith o addasu Adeilad hanesyddol Jennings ym Mhorthcawl yn gaffi poblogaidd a chanolfan busnesau bach gan gyflogi 80 o bobl, yn cael sylw yn yr adroddiad hefyd.
Mae’r prif ffigurau’n dangos bod twristiaeth treftadaeth a gwaith adeiladu treftadaeth yng Nghymru’n creu cyflogaeth ar gyfer 40,000 o bobl, a bod yr ymweliadau ysgol â’r Amgueddfa Genedlaethol a safleoedd hanesyddol a reolir gan Cadw yn gwneud y sector treftadaeth yn gyfrwng dysgu gwych yng Nghymru. Mae treftadaeth yn denu nifer sylweddol o dwristiaid i Gymru hefyd, a gwnaeth gwariant ymwelwyr gyfraniad o £1.72 biliwn at economi Cymru'r llynedd.
Mae’r adroddiad yn dangos hefyd bod swyddogion cadwraeth yn haeddu llawer mwy o glod, gan fod eu gwaith yn mynd ymhell tu hwnt i oruchwylio prosiectau’n ymwneud ag adeiladau hanesyddol yn unig: maen nhw’n cyflawni rôl hanfodol mewn prosiectau adfywio, gan godi arian, annog partneriaethau a chynnig gweledigaeth o ddyfodol gwell ar gyfer adeiladau hanesyddol ledled Cymru y mae pobl mor hoff ohonynt.
