Rydym ni’n defnyddio JavaScript i osod y rhan fwyaf o’n cwcis. Yn anffodus, nid yw JavaScript yn rhedeg ar eich porwr, felly ni allwch newid eich gosodiadau trwy ddefnyddio’r dudalen hon. I reoli eich gosodiadau cwcis trwy ddefnyddio’r dudalen hon, rhowch gynnig ar droi JavaScript ymlaen yn eich porwr.

Gwybodaeth am gwcis

Rydym wedi arbed rhai ffeiliau o’r enw cwcis i’ch dyfais. Mae’r cwcis hyn:

  • yn hanfodol i waith y safle
  • yn helpu gwella’n gwefan trwy gasglu gwybodaeth ac adrodd am sut rydych chi’n ei defnyddio

Hefyd, hoffem arbed rhai cwcis i helpu:

  • gwella ein gwefan trwy fesur y defnydd o’n gwefan
  • cofio eich gosodiadau
Newid gosodiadau cwcis

Rydych chi wedi derbyn yr holl gwcis ar gyfer y wefan hon. Gallwch newid eich dewisiadau ar gyfer cwcis unrhyw bryd.

Wedi ei gyhoeddi

Gall ymwelwyr fwynhau mynediad am ddim i gyfoeth o safleoedd hanesyddol Cymru ar Ddydd Gŵyl Dewi eleni (dydd Sadwrn 01 Mawrth 2025), wrth i Cadw ddathlu nawddsant Cymru.

O gestyll i abatai a safleoedd treftadaeth ddiwydiannol, bydd mynediad i 19 eiddo Cadw sydd fel arfer yn codi tâl mynediad am ddim ar Ddydd Gŵyl Dewi ond mae Cadw, gwasanaeth amgylchedd hanesyddol Llywodraeth Cymru, yn gofyn i ymwelwyr ystyried rhoi cyfraniad i’r elusen ganser Gymreig Tenovus.

Nid oes unrhyw orfodaeth i gyfrannu er mwyn cael mynediad i safleoedd Cadw, ond gall y rhai sy'n dymuno gwneud hynny helpu i roi gobaith i filoedd o bobl drwy gyfrannu swm o’u dewis drwy fewngofnodi i: https://tenovuscancercare.enthuse.com/pf/welsh-government-staff

Nod Tenovus, sef dewis elusen staff Llywodraeth Cymru eleni, yw rhoi'r mynediad gorau i'r driniaeth a'r cymorth sydd eu hangen i unrhyw un y mae canser yn effeithio arnynt, yng Nghymru a thu hwnt. Dyfodol sy'n lleihau effaith canser, yn rhoi gobaith i bobl ac yn eu helpu i fyw eu bywyd gorau.

Gall eich rhodd wneud gwahaniaeth mawr:

Gallai £10 helpu nyrsys Llinell Gymorth Tenovus i roi gwybodaeth hanfodol am ganser a chynnig cyngor penodol i rywun sydd wedi cael diagnosis.

Gallai £20 helpu ymgynghorwyr yr elusen i gwblhau gwiriad budd-daliadau llawn ar gyfer rhywun â chanser, gan eu helpu i gael mynediad at y grantiau a'r budd-daliadau y mae ganddynt hawl iddynt.

Digwyddiadau Cadw sy’n cael eu cynnal i ddathlu Dydd Gŵyl Dewi 2025

Dathliad Dydd Gŵyl Dewi (Castell Conwy)

Dydd Sadwrn 1 Mawrth, 11:00 – 11:30 a 14:00 – 14:30

I ddathlu Dydd Gŵyl Dewi yng ngogledd Cymru, gallwch fwynhau sain Côr Meibion Maelgwn wrth i chi grwydro ein castell canoloesol yng Nghonwy ar gyfer diwrnod o ddathliadau.

Cennin Pedr Dydd Gŵyl Dewi (Castell Caernarfon)

Dydd Sadwrn 1 Mawrth, 10:00 – 16:00 

Dathlwch flodyn cenedlaethol Cymru gyda gweithdy gwneud cennin Pedr papur yng Nghastell Caernarfon ar ôl edrych o gwmpas y castell canoloesol arbennig hwn.

Dathliadau Dydd Gŵyl Dewi (Castell Caerffili)

Dydd Sadwrn 1, Dydd Sul 2 a Dydd Llun 3 Mawrth, 10:00 – 15:00

Dewch i ymweld â chastell mwyaf Cymru gyda phenwythnos o weithgareddau yng Nghastell Caerffili, gan gynnwys teithiau  o amgylch y castell dan arweiniad y ceidwaid, gan ymchwilio i fythau a chwedlau Cymru.

Dathlu Dydd Gŵyl Dewi (Castell Dinbych)

Dydd Sadwrn 1 Mawrth, 10:00 – 16:00

Gwisgwch eich gwisg draddodiadol Gymreig orau, neu unrhyw eitem goch, ar gyfer diwrnod bywiog o gerddoriaeth, danteithion wedi’u pobi a chrefftau yng nghaer ganoloesol Castell Dinbych.

Er mwyn osgoi siom, cynghorir ymwelwyr â Phlas Mawr i archebu eu tocynnau mynediad am ddim ymlaen llaw, gan fod cyfyngiad llym ar nifer y tocynnau sydd ar gael ar gyfer ymweliad bore neu brynhawn. Mae'r rhain ar gael ar sail y cyntaf i'r felin a rhaid eu harchebu ymlaen llaw yma.

Dywedodd Jack Sargeant AS, y Gweinidog Diwylliant, Sgiliau a Phartneriaeth Gymdeithasol:

"Mae Cadw wedi ymrwymo i wneud treftadaeth Cymru yn hygyrch i bawb ac mae cynnig mynediad am ddim ar Ddydd Gŵyl Dewi yn ffordd wych o wneud hynny.

"Mae yna amrywiaeth o safleoedd i'w harchwilio, o gaer fwyaf Cymru, Castell Caerffili, gyda'i thŵr cam eiconig, i Lys yr Esgob Tyddewi — wedi'i leoli ger Eglwys Gadeiriol Tyddewi, lle sefydlodd nawddsant Cymru, Dewi Sant, ei fynachlog.

"Rydym yn gobeithio y bydd ymwelwyr hefyd yn cefnogi ein helusen enwebedig, Tenovus, gan fod pob rhodd wir yn gwneud gwahaniaeth."

Dywedodd Alexandra Smith, Rheolwr Dyngarwch a Digwyddiadau Arbennig Gofal Canser Tenovus:

"Mae hon yn fenter wych i gefnogi Tenovus a galluogi pobl i fwynhau rhai o lefydd mwyaf eiconig Cymru. Gyda mwy o bobl nag erioed yn byw gyda chanser yng Nghymru, mae angen ein gwasanaethau fwy nag erioed. Rydym yn deall sut y gall canser effeithio ar bob agwedd ar fywyd a sut mae'n effeithio ar deuluoedd a ffrindiau hefyd. 

"Mae ein hystod eang o wasanaethau yn cynnig gwybodaeth, cyngor a chefnogaeth arbenigol ddwyieithog i bobl sy'n byw gyda chanser, a'u hanwyliaid."