Cynllunio eich ymweliad addysg

Mae Cadw wedi ymrwymo i groesawu Ymweliadau Addysgol i'n safleoedd, ond rydym yn disgwyl i'r rhain gael eu cynnal mewn ffordd ddiogel a gwybodus – Asesiad Risg.

Cyn ymweld ag un o'n henebion fel rhan o'ch ymweliad addysgol, argymhellir y dylech edrych ar dudalen y safle penodol ar wefan Cadw. Mae hyn wedi'i ddatblygu i sicrhau bod gennych ddealltwriaeth o nodwedd unigryw'r safle a'r peryglon a allai fodoli. Bydd hyn yn eich helpu i lunio eich asesiad risg a chofnodi sut rydych chi'n bwriadu cadw eich grŵp yn ddiogel mewn amgylchedd hanesyddol.

Mae Cadw yn cynnig ymweliadau arolygu / ymgyfarwyddo am ddim ymlaen llaw. Mae hyn yn rhoi cyfle i'r athro / asesydd risg fynychu'r safle cyn yr ymweliad addysgol er mwyn cynllunio gweithgareddau dysgu a chynorthwyo gyda llunio asesiad risg eich ymweliad addysgol, yn barod i'w anfon i EVOLVE (lle bo hynny'n berthnasol) a’i anfon ar wahân i Cadw. Byddem yn eich annog yn daer i fanteisio ar yr ymweliadau hyn cyn dod â grŵp i’r safle.

Bydd staff Cadw ar y safle yn hapus i rannu eu gwybodaeth am y safle gydag athrawon yn ystod ymweliadau ymgyfarwyddo, sydd hefyd yn cynnig y cyfle i brynu arweinlyfr ac adnoddau eraill. At hynny, cofiwch bori drwy’r tudalennau unigol ar gyfer safleoedd, sy’n rhoi gwybodaeth am gyfleusterau a threfn safleoedd ac unrhyw beryglon sydd yno. Bydd y rhain yn wirioneddol ddefnyddiol o safbwynt eich helpu i gynllunio taith ddiogel. Gwiriwch gyda'r safle bod y cyfleusterau'n ddigonol ar gyfer eich anghenion cyn archebu eich ymweliad. Mae darpariaeth toiledau a mynediad i'r anabl mewn rhai henebion yn gyfyngedig. Hefyd, ychydig iawn o gysgod sydd ar gael ar rhai safleoedd ac mae'r ddaear yn aml yn anwastad - felly gwnewch yn siŵr bod pawb yn y grŵp yn dod â dillad sy’n dal dŵr ac yn gwisgo esgidiau addas.

Asesiadau Risg

Mae athrawon ac arweinwyr grŵp yn gyfrifol am gynnal asesiadau risg cyn yr ymweliad, yn unol â’r canllawiau a gyhoeddwyd gan awdurdodau addysg lleol. Os bwriedir archebu nifer o ymweliadau safle, dim ond un asesiad risg sy'n ofynnol gan Cadw, cyn belled â bod amgylchiadau'r ymweliadau yn debyg e.e. maint y grŵp, cludiant i'r safle ac ati.

Mae gofyn i bob ysgol ddatblygu a diweddaru asesiadau risg addysgol, felly dylai asesiadau o’r fath fod wedi’u datblygu eisoes ar gyfer eich sefydliad ac mae’n bosibl y bydd y rheini yn ddigonol i’w hanfon yn rhan o broses archebu Cadw. Fodd bynnag, i’r sawl nad oes ganddynt unrhyw asesiadau risg addysgol ar hyn o bryd neu sydd am wneud eu hasesiadau risg addysgol presennol yn fwy perthnasol neu’n fwy trylwyr, rydym wedi atodi templed isod i’ch cynorthwyo i wneud hynny.

Dyma rai o'r peryglon y byddem yn disgwyl eu gweld yn cael eu hystyried a'u cynnwys o fewn eich Asesiad Risg, o ran yr elfen ymweliad safle:

• teithio y ôl a blaen i'r heneb (bws/cerdded)
• diogelu
• cymorth cyntaf
• rheoli meddyginiaethau ac anghenion meddygol
• rheoli ymddygiad ar y safle (dianc, gwrthdaro ag eraill)
• tywydd - haul, rhew, glaw
• disgyblion ar goll
• rheoli disgyblion mewn henebion hanesyddol – llithro a baglu, cerdded ar waliau uchel, grisiau serth anwastad, tyrau, ardaloedd golau gwan
• cyswllt ag anifeiliaid (adar, cŵn) – brathiadau, pigiadau, cyswllt â charthion adar ac anifeiliaid
• ymgymryd ag unrhyw weithgareddau a gynlluniwyd ar y safle.

Ar ôl ystyried yr uchod os oes gennych ymholiadau penodol o hyd ynglŷn â'ch Asesiad Risg ar gyfer Cadw, anfonwch e-bost at Cadw.RAMsSubmission@gov.wales. 

Bathodyn / ffurflen 'Darparwr Gweithgareddau Addysgol' Dysgu y tu allan i'r Ystafell Ddosbarth (LOtC)

Efallai y bydd eich protocol Ymweliadau Awyr Agored yn gofyn i chi wirio a oes gan Ddarparwyr Gweithgareddau fathodyn Dysgu y tu allan i'r Ystafell Ddosbarth neu’n ei gwneud yn ofynnol iddynt lenwi ffurflen. Nid yw Cadw yn 'Ddarparwr Gweithgareddau Addysgol' yn yr ystyr hwn gan fod ein cynnig ymweliadau yn hunan-arweiniol (wedi'i gadarnhau gyda Dysgu y tu allan i'r Ystafell Ddosbarth). Felly, nodwch na fyddwn yn cwblhau unrhyw ffurflenni sy'n ymwneud â hyn. Ond ni ddylai hyn atal eich ymweliad. Gyda golwg ar gwestiynau perthnasol, gallwch fod yn sicr fel asiantaeth o fewn Llywodraeth Cymru: Rydym yn cydymffurfio â’r Ddeddf Diogelu Data a GDPR; Rydym yn hunan-yswirio; mae gennym Bolisïau a mesurau rheoli Iechyd, Diogelwch ac Argyfwng ar gyfer ein safleoedd; ac mae gennym fesurau llym gyda golwg ar fesurau rheoli Adnoddau Dynol a fetio staff.  

Gwybodaeth bellach

Mae’r ardal Dysgu a’r dudalen Adnoddau ar y wefan hon yn fan cychwyn da wrth gynllunio gweithgareddau eich ymweliad. Ceir ystod eang o ddeunyddiau y gallwch eu defnyddio cyn, yn ystod ac ar ôl eich ymweliad, sy’n cynnwys adnoddau’n ymwneud â’r cwricwlwm, a fydd wrth iddynt gael eu hehangu gydag amser yn hybu’r Celfyddydau Mynegiannol, Iechyd a Lles, y Dyniaethau, Ieithoedd, Llythrennedd a Chyfathrebu, Mathemateg a Rhifedd, Gwyddoniaeth a Thechnoleg, llythrennedd digidol a mwy.

Weithiau bydd tywydd gwael yn golygu bod ein safleoedd yn gorfod cau ar fyr rybudd. Hoffem ymddiheuro am unrhyw anghyfleustra ond nid yw’n bosibl rhoi rhybudd ymlaen llaw i athrawon ar yr adegau prin hynny. Cadwch olwg ar Hafan | Cadw (llyw.cymru) ac ar y tudalennau unigol ar gyfer safleoedd i gael y wybodaeth ddiweddaraf am fynediad. Mae’n bosibl hefyd y byddwch am gysylltu â’n sianelau ar gyfryngau cymdeithasol Twitter / YouTube / Instagram / Facebook i gael y wybodaeth ddiweddaraf. A gallwch gofrestru i gael ein llythyr newyddion hefyd.

Cliciwch yma i weld y canllawiau llawn ynghylch ymweliadau addysgol ar wefan Llywodraeth Cymru.