Rydym ni’n defnyddio JavaScript i osod y rhan fwyaf o’n cwcis. Yn anffodus, nid yw JavaScript yn rhedeg ar eich porwr, felly ni allwch newid eich gosodiadau trwy ddefnyddio’r dudalen hon. I reoli eich gosodiadau cwcis trwy ddefnyddio’r dudalen hon, rhowch gynnig ar droi JavaScript ymlaen yn eich porwr.

Gwybodaeth am gwcis

Rydym wedi arbed rhai ffeiliau o’r enw cwcis i’ch dyfais. Mae’r cwcis hyn:

  • yn hanfodol i waith y safle
  • yn helpu gwella’n gwefan trwy gasglu gwybodaeth ac adrodd am sut rydych chi’n ei defnyddio

Hefyd, hoffem arbed rhai cwcis i helpu:

  • gwella ein gwefan trwy fesur y defnydd o’n gwefan
  • cofio eich gosodiadau
Newid gosodiadau cwcis

Rydych chi wedi derbyn yr holl gwcis ar gyfer y wefan hon. Gallwch newid eich dewisiadau ar gyfer cwcis unrhyw bryd.

Castell Caernarfon
Wedi ei gyhoeddi

Mae Cyngor Gwynedd wedi rhoi caniatâd cynllunio ar gyfer ailddatblygiad arloesol Porth y Brenin yng  Nghastell Caernarfon — gan nodi pennod newydd yn hanes cyfoethog y safle canoloesol.

Disgwylir i'r prosiect £4 miliwn fod yn un o brosiectau mwyaf a mwyaf cymhleth Cadw hyd yma, gyda phopeth wedi'i gynllunio o waith cadwraeth hanfodol a gwelliannau o ran hygyrchedd, i gyflwyno mannau dehongli newydd trochol i wella profiadau ymwelwyr.

Mae cymeradwyo’r cynlluniau yn cyd-fynd â phenodi prif gontractwr ar gyfer y prosiect, sef Grosvenor Construction o Rhyl, a ddewiswyd yn dilyn proses dendro agored gystadleuol.

O 30 Tachwedd 2020, bydd y tîm yn Grosvenor Construction - dan oruchwyliaeth tîm cadwraeth arbenigol Cadw - yn dechrau codi 190 tunnell o sgaffaldiau i gael mynediad i ben tyrau Porth y Brenin sy’n 25m o uchder.

Gyda’r gwaith adnewyddu i fod i gael ei gwblhau yn gynnar yn 2022, am y tro cyntaf ers mwy na chanrif, nid y porth yma fydd yn croesawu ymwelwyr; yn hytrach, bydd prif fynedfa dros dro trwy Borth y Dŵr hanesyddol sydd wrth droed Tŵr yr Eryr.

Pan fydd y gwaith wedi'i gwblhau, bydd Porth y Brenin yn cynnwys dec gwylio newydd ar lefel uchaf y porthdy, a man arlwyo parhaol — gyda Cadw’n bwriadu rhoi’r lle ar y farchnad yn 2021, gan gynnig cyfle i fusnesau lleol redeg y caffi ar dir y castell. Hefyd, bydd y gwaith datblygu yn gweld cyfleusterau toiled hygyrch a siop anrhegion, yn ogystal â chyfleuster dehongli hanesyddol newydd sbon i ymwelwyr ei fwynhau.  Yn y cyfamser, bydd gwaith cadwraeth pwysig ar y tyrau cyfagos yn helpu i amddiffyn y strwythur canoloesol am genedlaethau i ddod. 

Dywedodd Will Mellor, Cyfarwyddwr Grosvenor Construction:

“Mae’n anrhydedd i ni dderbyn y contract ar gyfer ailddatblygu Porth y Brenin. Gan ddefnyddio ein harbenigedd helaeth ym maes gwarchod henebion, edrychwn ymlaen at ddod â'r cynlluniau'n fyw a chwarae rhan werthfawr yn 700 mlynedd o hanes y castell.”

Ychwanegodd Dirprwy Weinidog Diwylliant, Chwaraeon a Thwristiaeth Cymru, yr Arglwydd Elis-Thomas:

“Rwy’n croesawu’r cyhoeddiad hwn yn fawr, sy’n nodi pennod newydd gadarnhaol i Gastell Caernarfon a’i ymwelwyr.

“Mae gwneud gorffennol Cymru yn fwy hygyrch i bobl o bob cefndir yn hanfodol, a thrwy dechnoleg arloesol, gallwn ddatgloi rhannau o'n safleoedd hanesyddol sydd heb eu harchwilio eto wrth ymchwilio'n ddyfnach i'w hanesion.

“Hoffwn ddiolch i aelodau ac ymwelwyr Cadw am eu cefnogaeth barhaus, sydd wedi ein helpu i ofalu am ein hadeiladau hanesyddol gwerthfawr yn ystod yr amser anodd hwn.”

I gael mwy o wybodaeth am brosiect Porth y Brenin Castell Caernarfon, ewch i, chwiliwch am Cadw ar Facebook neu dilynwch @CadwWales neu @CadwCymru ar Twitter.