Drysau Agored - Capel Beili Du, Pentre-bach, Pontsenni

Mae Beili Du yn adeilad rhestredig Gradd II ac yn enghraifft ardderchog o gapel mur-hir mewn lleoliad gwledig, gyda gwaith coed wedi’i baentio â graen ffug, yn nodweddiadol o’i gyfnod. Sefydlwyd yr achos yma yn 1790 a gosodwyd darn o dir yn perthyn i fferm Beili Du ar brydles i’r ymddiriedolwyr yn 1800.

Ailadeiladwyd y capel presennol yn 1858, pan oedd ei arddull ‘mur-hir’ gwyngalchog rwbel braidd yn hen-ffasiwn yn ei gyfnod.  Nid oes prin unrhyw arlliw o’r ffasiwn Fictoraidd y tu mewn, gan gynnwys y pulpud sydd megis twba.

Mae hwn yn gyfle i bobl weld y capel.

Cyfeiriad - Beili Du, Pentre-bach, Pontsenni, Sir Frycheiniog, LD3 8UB.

Cyfarwyddiadau - i gyfeiriad Aberhonddu ar yr A40 trwy Bontsenni, wrth i chi adael Pontsenni, cymerwch y troad ar y chwith ag arwyddion am Bentre-bach a Phentre'r Felin. Dilynwch y ffordd heibio i SENTA a pharhau nes i chi gyrraedd Pentre'r Felin. Trowch i'r dde dros y bont, gan ddilyn yr arwyddion i Bentre-bach a'r Country Pub. Parhewch ar hyd y ffordd heb droi oddi arno nes i chi gyrraedd Pentre-bach. Wrth i chi agosáu at y pentref fe welwch chi Gapel Beili Du ar draws y dyffryn ar eich chwith. Unwaith y byddwch yn y pentref, gallwch barcio y tu allan i'r Shoemakers Arms. I ymweld â'r capel, croeswch y bont goncrit fechan ychydig cyn y maes parcio a dilynwch y lôn i'r capel.

Nid oes angen archebu ymlaen llaw.