Mur Porthladd Cas-gwent

Olion helaeth muriau trefol canoloesol 

Wedi’u hadeiladu gan yr arglwydd Normanaidd Roger Bigod III rhwng 1272 a 1278 pan aeth ati i wneud gwelliannau i’r castell, mae muriau Cas-gwent yn dal yn nodwedd drawiadol ar y dref heddiw. Yn sefyll hyd at 13 troedfedd/4m o uchder, roeddent yn ymestyn yn wreiddiol am bron dri chwarter milltir o ben gorllewinol y castell yr holl ffordd i Afon Gwy yn y de, yn amgáu’r dref ganoloesol, y porthladd ac ardal agored fawr o berllannau a dolydd. Mae darnau helaeth o’r wal yn dal i sefyll, ynghyd â phorth y dref ac olion nifer o’r 10 tŵr hanner crwn a safai ar ffurf reolaidd.