Rydym ni’n defnyddio JavaScript i osod y rhan fwyaf o’n cwcis. Yn anffodus, nid yw JavaScript yn rhedeg ar eich porwr, felly ni allwch newid eich gosodiadau trwy ddefnyddio’r dudalen hon. I reoli eich gosodiadau cwcis trwy ddefnyddio’r dudalen hon, rhowch gynnig ar droi JavaScript ymlaen yn eich porwr.

Gwybodaeth am gwcis

Rydym wedi arbed rhai ffeiliau o’r enw cwcis i’ch dyfais. Mae’r cwcis hyn:

  • yn hanfodol i waith y safle
  • yn helpu gwella’n gwefan trwy gasglu gwybodaeth ac adrodd am sut rydych chi’n ei defnyddio

Hefyd, hoffem arbed rhai cwcis i helpu:

  • gwella ein gwefan trwy fesur y defnydd o’n gwefan
  • cofio eich gosodiadau
Newid gosodiadau cwcis

Rydych chi wedi derbyn yr holl gwcis ar gyfer y wefan hon. Gallwch newid eich dewisiadau ar gyfer cwcis unrhyw bryd.

Wedi ei gyhoeddi

Mae’n argoeli’n wanwyn cyffrous yn Cadw sydd ag amserlen lawn dop o ddigwyddiadau a gweithgareddau wedi'u cynllunio ar draws ei henebion hanesyddol dros wyliau'r Pasg. 

O helfa wyau Pasg i ddilyn llwybrau’r cwningod, o gamu'n ôl i fwrlwm y canol oesoedd i ddysgu sgiliau newydd mewn gweithdai syrcas, mae rhywbeth at ddant pawb gan Cadw dros wyliau'r Pasg. Bydd yna brofiadau hwyliog, anturus ac addysgol i ymwelwyr hen ac ifanc.

Meddai Pennaeth Cadw, Gwilym Hughes:

"Mae gwyliau'r Pasg yn amser perffaith i deuluoedd fynd am dro ac archwilio hanes gwych Cymru a'r straeon cyfoethog sydd ar garreg eu drws. Roedden ni’n awyddus i greu amserlen yn llawn dop o ddigwyddiadau fel y gallai teuluoedd fwynhau amser gwerth chweil gyda'i gilydd ond hefyd roedden ni am ysbrydoli ymdeimlad o falchder a chwilfrydedd am ein treftadaeth Gymreig.

"Bydd y plant yn cael mynd am ddim gydag unrhyw oedolyn sy’n aelod, sy'n cynnig gwerth gwych am arian i deuluoedd sydd am ymweld droeon gydol y flwyddyn. Mae aelodau'n mwynhau mynediad diderfyn i 132 o leoliadau hanesyddol ledled Cymru gydol y flwyddyn, ynghyd â gostyngiadau unigryw yn siopau rhodd Cadw ac atyniadau tebyg ledled y DU."

Dyma flas o'r hyn sydd ar gael ar draws rhai o leoliadau mwyaf poblogaidd Cadw yng Nghymru y gwanwyn hwn:

Gorllewin Cymru

Dydd Sul 20 a dydd Llun 21 Ebrill, 10:00-16:00

Dewch i ddal harddwch Castell Cydweli, campwaith Normanaidd sy'n edrych dros Afon Gwendraeth. Bydd teuluoedd yn dilyn y llwybr ac yn tynnu lluniau o dirnodau a nodweddion penodol ar dir y castell, gweithgaredd perffaith ar gyfer cyw-ffotograffwyr a’r rheini sydd wrth eu bodd gyda hanes.

Dydd Sul 20 a dydd Llun 21 Ebrill, 11:00-16:00

Dewch i ddarganfod Castell hudolus Talacharn yn ystod ei Helfa Wyau Pasg flynyddol, lle bydd ymwelwyr yn chwilio am wyau sydd wedi’u cuddio ar draws tiroedd y castell gyda chyfle i ennill gwobr Pasg! Mae croeso i chi wisgo’ch bonet Pasg.

De/canolbarth Cymru

Bob dydd o ddydd Sadwrn 12 Ebrill i ddydd Sul 27 Ebrill, 10:00-16:00

Plymiwch i faddonau Rhufeinig Caerllion er mwyn helpu Guto Gwningen i ddod o hyd i'w holl ffrindiau sydd wedi'u cuddio ar hyd y llwybr troellog trwy un o ddim ond tair caer llengfilwrol barhaol sy'n weddill ym Mhrydain.

Bob dydd o ddydd Llun 14 Ebrill i ddydd Sul 20 Ebrill, 10:00-16:00

Camwch i esgidiau’r torrwr cod canoloesol yng Nghastell Cas-gwent, yr amddiffynfa garreg ôl-Rufeinig hynaf sydd wedi goroesi ym Mhrydain. Bydd teuluoedd yn cael eu cadw’n brysur yn chwilio am gliwiau i ddatgelu'r cyfrinachau cudd sydd o fewn muriau'r castell.

Dydd Sadwrn 19 i ddydd Llun 21 Ebrill, 10:00-16:00

Ymunwch â llwybr y cwningod yn Llys a Chastell Tretŵr, rhyfeddod pensaernïol dau-mewn-un. Dewch i ddarganfod y tiroedd godidog a dilynwch y cliwiau i gwblhau'r antur. Gyda chyfle i ennill trit blasus!

Bob dydd o ddydd Gwener 18 Ebrill i ddydd Gwener 25 Ebrill, 10:00-16:00

Gall ymwelwyr ddilyn y llwybr Wyau Pasg yng Ngwaith Haearn Blaenafon, gan ddod o hyd i wyau cudd a dysgu straeon diddorol am dreftadaeth ddiwydiannol gyfoethog yr ardal. Bachwch ar y cyfle i wrando ar straeon gwych am draddodiadau'r Pasg yng Nghymru gyda'r storïwr ar 18, 19 a 21 Ebrill hefyd!

Gogledd Cymru

Dydd Sul 20 Ebrill, 11:00-15:00

Ymunwch â'r Helfa Wyau Pasg yng Nghastell Cricieth, y castell adfeiliedig o'r drydedd ganrif ar ddeg sy'n edrych dros Fae Tremadog. Chwiliwch am drysorau cudd ar draws tiroedd y castell, gan fwynhau'r golygfeydd syfrdanol ar draws Bae Ceredigion.

Dydd Sadwrn 19 Ebrill a dydd Sul 20 Ebrill, 10:00-16:00

Gall teuluoedd fwynhau diwrnod allan ar benwythnos y Pasg yng Nghastell Dinbych. Bydd amserlen brysur o weithgareddau’r castell yn cynnwys Helfa Wyau Pasg, ail-greu brwydr ganoloesol, perfformiadau canu a dawns rhyngweithiol, a chrefftau.

Dydd Sadwrn 19 Ebrill a dydd Sul 20 Ebrill, 10:00-16:00

Dewch ar antur i ddarganfod Castell Caernarfon, caer ganoloesol a gydnabyddir fel un o adeiladau mwyaf yr Oesoedd Canol. Bydd y plantos yn dilyn y cliwiau ac yn cwblhau heriau i ddatgelu'r wy Pasg prinnaf oll!

Bob dydd o ddydd Gwener 18 Ebrill i ddydd Llun 21 Ebrill, 10:00-17:00

Mae Wyau Pasg Castell Biwmares yn eu hôl gyda phenwythnos gŵyl y banc o weithgareddau hwyliog i bob oedran. Gall ymwelwyr fwynhau Helfa Wyau Pasg (dydd Sul a dydd Llun yn unig), gweithdai syrcas, a gweithgareddau gwersyll canoloesol, gan gynnwys saethyddiaeth a threialon arfwisg.

Dydd Sul 20 Ebrill, 10:00-16:00

Mwynhewch Sul y Pasg ym Mhlas Mawr, y tŷ tref Elisabethaidd gorau ym Mhrydain. Ymunwch yn Helfa Wyau'r Pasg a mwynhewch berfformiadau bywiog gan Gellweiriwr Conwy mewn lleoliad hanesyddol cwbl unigryw.

Dydd Sul 20 Ebrill, 10:00-16:00

Gall cyw-farchogion a'u teuluoedd gychwyn ar daith gyffrous yng Nghastell Conwy i ddod o hyd i arfwisg y Marchog Carwyn. Ewch i chwilota o gwmpas yr amddiffynfa ysbrydoledig a darganfod darnau cudd o'i wisg wedi'u gwasgaru ar hyd a lled y castell cyn i’ch amser ddod i ben!

Am ragor o wybodaeth am y digwyddiadau’r mis, ewch i wefan swyddogol Cadw:  https://cadw.llyw.cymru