Drysau Agored - Castell Maenorbŷr

Yn codi'n falch uwchben tywod euraidd Traeth Maenorbŷr, mae'r castell Normanaidd godidog hwn o'r 11eg ganrif wedi bod yn cadw golwg dros arfordir Sir Benfro ers bron i fil o flynyddoedd. Mae ei safle amlwg yn cynnig golygfeydd ysblennydd o'r môr, a’i waliau cerrig mawreddog yn dweud stori am deuluoedd bonedd, bywyd canoloesol, a chwedlau lleol.

Dewch i mewn i archwilio’r siambrau atmosfferig, dringo'r tyrau hynafol, a chrwydro trwy’r gerddi hardd. Wedi'i gynllunio i fod yn gadarnle arfordirol aruthrol, ond erioed wedi gorfod gwrthsefyll ymosodiad, mae Castell Maenorbŷr yn cynnig taith fythgofiadwy trwy amser yn un o leoliadau arfordirol mwyaf hudolus Cymru.

Dathlwch Drysau Agored Cadw yng Nghastell Maenorbŷr ddydd Sul 20 Medi, gyda mynediad rhad ac am ddim i bawb sy'n ymweld. Dewch i ddarganfod y dehongliad gweledol a chlywedol newydd, sy'n dod â'r byd canoloesol yn fyw, ac archwiliwch ein harddangosfeydd rhyngweithiol.

Yna, mwynhewch ddetholiad o gacennau, cinio sawrus a lluniaeth yn yr ystafell de cyn ymlacio ar y lawnt. Teimlo'n egnïol? Rhowch gynnig ar gêm o denis mini fel y Fictoriaid a chael blas o hoff hobi’r oes a fu.

Mae rhywbeth i bawb ei fwynhau trwy gydol y dydd.

Cyfeiriad - Castell Maenorbŷr, Maenorbŷr, Dinbych-y-pysgod, SA70 7SY.

Mae'r safle yng nghanol pentref Maenorbŷr, yn edrych dros y glannau ar Lwybr Arfordir Sir Benfro. Y cod post ar gyfer Sat Nav yw SA70 7SY.
What3Words ///earmarked.entrust.expressed

Argymhellir parcio ym Maes Parcio Traeth Maenorbŷr (codir tâl). Mae wedyn yn daith gerdded fer i fyny'r bryn i'r "Fynedfa Gyfrinachol" yn ochr y castell. Mae parcio cyfyngedig i bobl anabl yn y castell, cysylltwch â'r castell cyn eich ymweliad i gael rhagor o wybodaeth.
Mae bws rhif 349 yn eich gollwng yn y pentref, wrth ymyl y maes chwarae a dim ond 2 funud o waith cerdded sydd i'r castell.

Nid oes angen archebu ymlaen llaw.